អគ្គលេខាធិការអាស៊ាន អនុញ្ញាតឱ្យ លេខាធិការគណបក្សនៃគណៈកម្មាធិការខេត្ត Zhejiang ប្រទេសចិន ចូលជួបសំដែងការគួរសម និងពិភាក្សាការងារ

(ហ្សាការតា, ឥណ្ឌូណេស៊ី)៖ នៅព្រឹកថ្ងៃអង្គារ ទី១៤ ខែវិច្ឆិកា ឆ្នាំ២០២៣ នៅលេខាធិការដ្ឋានអាស៊ាន ប្រចាំទីក្រុងហ្សាការតា សាធារណរដ្ឋឥណ្ឌូណេស៊ី លោកបណ្ឌិត កៅ គឹមហួន អគ្គលេខាធិការអាស៊ាន បានអនុញ្ញាតឱ្យលោក Yi Lianhong លេខាធិការគណបក្ស នៃគណៈកម្មាធិការខេត្ត Zhejiang ប្រទេសចិន ចូលជួបសំដែងការគួរសម និងពិភាក្សាការងារ។

នៅក្នុងឱកាសនោះ ភាគីទាំងពីរបានផ្លាស់ប្តូរទស្សនៈអំពីភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-ចិន និងស្វែងរកវិធីនានា ដើម្បីពង្រឹងបន្ថែមនូវកិច្ចសហប្រតិបត្តិការរវាងខេត្ត Zhejiang ជាមួយអាស៊ាន និងជាមួយប្រទេសសមាជិកអាស៊ាន។

ដោយឡែកនៅព្រឹកថ្ងៃអង្គារដដែលនោះ លោក Sheikh Mohamed Ahmed Salim Al Shanfari ឯកអគ្គរាជទូតទើបតែងតាំងថ្មីប្រទេសអូម៉ង់ប្រចាំអាស៊ាន បានប្រគល់សារតាំងជូន លោកបណ្ឌិត កៅ គឹមហួន អគ្គលេខាធិការអាស៊ាន។

នៅក្នុងឱកាសនោះ ភាគីទាំងពីរបានគូសបញ្ជាក់អំពីតម្រូវការដើម្បីស្វែងរកសក្តានុពលសម្រាប់កិច្ចសហការបន្ថែមទៀត រវាងអាស៊ាន និងអូម៉ង់ ព្រមទាំងទន្ទឹងពង្រឹងកិច្ចសហប្រតិបត្តិការនៅក្នុងវិស័យ ដែលជាប្រយោជន៍ទៅវិញទៅមក រួមទាំងតាមរយៈ ក្របខណ្ឌអាស៊ាន-ក្រុមប្រឹក្សាសហប្រតិបត្តិការឈូងសមុទ្រ។

បន្ទាប់មក លោក Talip Küçükcan ឯកអគ្គរដ្ឋទូតទើបតែងតាំងថ្មីនៃសាធារណរដ្ឋតួកគីប្រចាំអាស៊ាន បានប្រគល់សារតាំងជូនលោកបណ្ឌិត កៅ គឹមហួន អគ្គលេខាធិការអាស៊ាន។

នៅក្នុងឱកាសនោះ ភាគីទាំងពីរបានបញ្ជាក់ឡើងវិញនូវការប្តេជ្ញាចិត្ត ក្នុងការធ្វើការរួមគ្នា ដើម្បីធ្វើឱ្យភាពជាដៃគូសន្ទនាតាមវិស័យរវាងអាស៊ាន និងតួកគី កាន់តែមានទម្ងន់៕